هەواڵە تایبەتەکان: بە پێی هەواڵەکان هێزەکانی حەشدی شەعبی گەڕاونەتەوە شنگال و ناوچەکانی رۆژئاوای موسڵ و پاراستنی ئەمنیەتی ناوچەکەیان گرتۆتەوە ئەستۆ.
هێزەکانی حەشدی شەعبی بە سێ لیوای کە لە ٩ تا ١٠ هەزار کەس پێک دێت لە پێنجشەممەی رابردوو بە فەرمانی موستەفا کازمی فەرماندەی گشتی هێزە چەکدارەکانی عێراق بۆ ناوچەی شنگال و ناوچەکانی دەوروبەری نێردراون.
هەر بە پێی هەواڵەکان عەبدولعەزیز موحەمەداوی سوپاسالاری حەشدی شەعبی کە بە ئەبوفەدەک ناسراوە لەگەڵ شاندی یاوەری سەردانی ناوچەکەی کردووە و لەگەڵ خەڵکی ناوچەکە دیدار و گفتوگۆی کردووە.
یەکێک لە فەرماندەکانی حەشدی شەعبی رایگەیاند: " چەند ڕۆژی رابردوو لە بەغدا بە ئێمەیان رایگەیاند کە بۆ ڕێگری کردن لە هەر جۆرە هێرشێکی تورکیا بۆ سەر شنگال دەبێت ئامادە بن، هەر بۆیە نزیکەی ١٠ هەزار لە هێزەکانی ئێمە بۆ ناوچەکە نێردراون."
ئەم فەرماندەیە هەروەها رایگەیاند: "بە پێی زانیارییەکان کە پێمان گەیشتووە، تورکیا بە نیازە هێرش بکاتە سەر شنگال و دوای هێزەکانی پێشمەرگە [سەر بە پارتی] تێدا جێگیر بکات. "
دوای رێککەوتنی مانگی ١٠ی ساڵی رابردوو لە نێوان حکومەتی موستەفا کازمی و حزبی پارتی دیموکراتی کوردستان سەبارەت بە شنگال، حەشدی شەعبی بە دوری ٥ کیلۆمەتر لەو ناوچەیە دوور خرایەوە و ئەمە یەکەم جارە دوای ئەو ماوەیە ئەو هێزانە بۆ ناوچەکە دەگەڕێنەوە.
هەروەها لەگەڵ زیادبوونی هێرشەکانی داعش لە ناوچە جیاجیاکانی عێراق و راگەیاندنی سەردانەکەی پاپی ڤاتیکان لە رۆژانی داهاتوو بۆ عێراق و ئەگەری سەردانی لە شاری قەرەقوش لە نزیک موسڵ، دەتوانێت یەکێک لە هۆکارەکانی دیکەی ناردنی هێزەکانی حەشدی شەعبی بۆ شنگال و دەوروبەری، پاراستنی ئەمنیەتی ناوچە بێت.
ليست هناك تعليقات:
إرسال تعليق
هەڵوێستی خۆت لەسەر ئەم بابەتە لە خوارەوە بنووسە.